Paratoi at fynd i’r Brifysgol
Os ydych yn darllen hwn, mae’n debyg eich bod wedi mynd drwy’r broses gwneud cais, wedi penderfynu ar brifysgol ac wedi cadarnhau ymhle y byddwch yn astudio. Os dyna’r achos, mae’n debyg bod gennych gant a mil o gwestiynau am eich dewis prifysgol, o’r hyn i ddisgwyl yn ystod wythnos y glas, i gyda phwy y byddwch yn byw a beth sydd angen i chi ei gymryd gyda chi i le fydd eich ‘cartref newydd’ .
Os ydych yn chwilio am ganllaw i’r hyn y dylech ei bacio i fynd i’r brifysgol, edrychwch ar fy mlog arall! Os hoffech chi wybod sut bobl y byddwch yn byw gyda nhw, un syniad yw defnyddio’r cyfryngau cymdeithasol i weld pwy arall fydd yn eich fflat/tŷ a dod i’w hadnabod gan leddfu eich meddwl chi, eich rhieni a’u meddwl nhw.
Cyn i chi adael am y brifysgol, gwnewch yn siŵr eich bod wedi sefydlu cyfrif banc myfyriwr. Os oes gennych un, grêt! Os nad oes, stopiwch osgoi’r peth – mae banciau wrth eu bod yn cynnig cymhellion i fyfyrwyr, sy’n golygu efallai y cewch chi gerdyn rheilffordd, yswiriant neu gerdyn UCM am ddim. Rhag ofn na chewch chi, mae cerdyn ACM yn hynod o ddefnyddiol i fyfyrwyr, gallwch gael un ar-lein a threfnu iddo gael ei anfon i gampws y brifysgol neu gwnewch o unwaith y byddwch yn cyrraedd y campws.
O ran wythnos y glas, dylech ddisgwyl llawer o sgyrsiau ymsefydlu – cewch amserlen a chanllaw ar gyfer y rhain. Gallwch ddisgwyl i lawer o ddigwyddiadau gael eu trefnu gan Undeb y Myfyrwyr, bydd rhestr ohonynt ar y dudalen Facebook. Os ydych yn dod i gampws Llambed, mae’n debyg y bydd gwibdaith ddewisol arall ar eich cyfer yn ogystal â chinio’r glas lle cewch gwrdd â’ch cymheiriaid. Yn ystod ffair y glas, bydd ein holl gymdeithasau yn yr un lle er mwyn ichi allu gweld beth sydd ar gael. Yn bersonol, rwy’n argymell eich bod yn ymuno â chymaint ag y gallwch yn ystod eich blwyddyn gyntaf oherwydd efallai na chewch chi gyfle i wneud hynny yn hwyrach yn ystod eich amser yn y brifysgol. Cofiwch, unwaith rydych wedi ymuno â chymdeithas, mae croeso i chi fynd i’w sesiynau blasu ac os nad ydych yn hoffi’r profiad, nid oes raid i chi fynd eto.
Ar y diwrnod y byddwch yn symud i mewn, cadwch lygad allan am Gyfeillion y Glas. Maent yn fyfyrwyr presennol yn y brifysgol sydd wedi bod trwy’r un broses, ac wedi gwirfoddoli i roi help llaw i fyfyrwyr newydd yn ystod wythnos y glas; byddant yn eich cymryd i’r lle iawn, eich helpu i ffeindio’ch ffordd o gwmpas y llety a byddant yn hapus i ateb unrhyw gwestiynau allai fod gennych ar eich diwrnod cyntaf.
Cofiwch fod y Brifysgol yn rhywle lle gallwch ddysgu llawer o bethau amdanoch chi eich hun a gwneud ffrindiau a fydd, gyda lwc, yn para oes.
Pob lwc !
Steph x